கொரோனா பாடம் !

ஆடுகிற ஆட்டமெல்லாம்
ஆடி வந்த மானிடா!
ஓடுகிற ஓட்டமெல்லாம்
ஓடி  முடித்த தேனடா?

காசு பணம் வேண்டுமெனக்
கருணை மனம் சொல்லுதா ?
உயிரு மட்டும் போதுமென்ற
ஞானம் வந்து பிறந்ததா?

குடியும் கூத்தும் போனதா
ஆட்டம் பாட்டம் ஓய்ந்ததா?
அடிதடிகள் மறந்து நெஞ்சில்
ஆணவத் திமிர்  ஒழிந்ததா ?

பந்தபாசம் வேண்டுமென்று
பயத்தில் மனம் வேண்டுதா ?
சொந்தபந்தம் எல்லோரையும்
சொந்தங்கொள்ளத் துடிக்குதா ?

ஆடுகிற ஆட்டம் கண்டு
இயற்கை தந்த அடியிது !
மூடிவைத்த வீட்டுக்குள்ளே
வைத்த சிறைப் படிப்பிது !

ஊரை ஏய்த்து வந்த பணம்
உதவிக்கரம் நீட்டுமா ?
வாங்கிவைத்த லஞ்சப்பணம்
வந்து உன்னைக் காக்குமா?

கோடிகோடியாக நீயும்
கொள்ளை அடித்த பணமெல்லாம்
வீடுதேடி வந்து உன்னை
கொள்ளிவைக்கும் பணமடா!

குடும்பத்தோடு வாழ வைத்த
சூச்சுமந்தான் புரியுதா?
சுற்றுச்சூழல் மூடிவைத்துச்
சொல்லும் சேதி தெரியுதா…

நலம் வாழ ஒரு பாட்டு !

நலம் வாழ ஒரு பாட்டு !
—�—�—�—�—�—�—�-:—�—�—�—�—�—�
பாட்டு ஒன்று பாடப்போறேன்
பக்குவமா கேட்டுக்கோ
பாட்டை நீயும் பாடிப்பார்த்து
பாதுகாப்பா வாழ்ந்துக்கோ

யாரை நீயும் தொடாதே
உன்னைத் தொட விடாதே
கையைக்கொடுத்து குலுக்காதே
கட்டி நீயும் அனைக்காதே !

தாயைத்தவிர குழந்தையை
யாரும் தொடக்கூடாது
தொட்டுத்தூக்கிக் குழந்தைக்கு
முத்தந்தரக் கூடாது !

மூக்கை மறைத்துத் தும்மணும்
வாயைப்பொத்தி இருமணும்
கண்ட இடத்தில் துப்பாதே
செருப்பு இன்றி நடக்காதே!

கூட்டம் கூடும் இடத்திலே
கூடி நீயும் நிற்காதே
சோப்பு போட்டு கையினை
கழுவ நீயும் மறக்காதே !

எந்த பொருளும் இரவலாய்
யாரிடமும் வாங்காதே
உந்தன்பொருளை யாவருக்கும்
பயன் படுத்தத் தராதே !

சளி பிடித்த நபரிடம்
நெருங்கி நீயும் போகாதே
சளியைத் தரும் உணவினை
வாங்கி நீயும் உண்ணாதே!

தொற்று நோய்கள் பரவிட
தோதாய் ஏதும் செய்யாதே
காற்றை மாசு ஆக்கிடும்
கரும்புகையை மூட்டாதே !

பாட்டு ஒன்று பாடப்போறேன்
பக்குவமா கேட்டுக்கோ
பாட்டை நீயும் பாடிப்பாத்து
பாதுகாப்பா வாழ்ந்துக்கோ !

தாலாட்டு !!!

ஆரிரரோ ஆரிரரோ
ஆராரோ ஆரிரரோ

பெத்தபுள்ளே நான் உனக்கு,
சொத்து சுகம் சேத்துவைப்பேன்--அத
கட்டிக்காத்து வாழ்ந்திடவே,
பட்டறிவும் சொல்லிவெப்பேன்!

பட்டறிவு நான் பெறவே
பட்ட அடி போதுமையா! கத்ததெல்லாஞ் சொல்லித்தாறேன்,
பக்குவமா கேட்டுக்கையா !

ஆரிரரோ ஆரிரரோ
ஆராரோ ஆரிரரோ

சொத்து பத்து அத்தனையையும்
சேத்து நீயும் வச்சிருந்தா,
சொந்தபந்தம் தேடிவந்து,
சேர்ந்து புகழ் பாடுமையா!

வித்து அதை நீ இழந்து,
சோகத்திலே தேய்ந்திருந்தா,
பெத்துப்பொறப்பு கூட உன்னை
பித்தனைப்போல் பாக்குமைய்யா !

ஆடிக்காத்தில் அம்மிக்கல்லும்
ஆட்டங்கண்டு போவதுபோல்,
பந்தபாச சொந்தமெல்லாம்
பேசி உன்னைக் கொல்லுமையா

ஆரிரரோ ஆரிரரோ
ஆராரோ ஆரிரரோ

குத்தங்குறை சொல்லி நித்தம்,
குத்துயிரா ஆக்குமையா
முத்திப்போனகத்திரியாய்
மூலையிலே வீசுமையா !

விட்டகுறை தொட்டகுறை,
என்று கதை கட்டுமையா
பட்டஅடி போதுமென்று,
பரிதவிக்க ஓட்டுமையா!

துன்பமுண்டு துயரமுண்டு
பூமியிலே நாம் பொறந்தா
என்பதனை நீ உணர்ந்து
ஏற்றமுடன் வாழோணும்..

ஆரிரரோ ஆரிரரோ
ஆராரோ ஆரிரரோ !

சூதுவாது இல்லாத
சுத்தமாக வாழோணும்
காலையிலே நீ எழுந்து
உன் தொழிலைப் பாக்கோணும்!

ஊருச்சொத்து வேண்டாமுன்னு
உறுதி மனம் கொள்ளோணும்
ஊருக்கு நீ உதவிசெஞ்சு
உத்தமனாய் வாழோணும்!

ஊருலகம் நூறு சொல்லும்
உதறிவிட்டு நானுனக்கு
சொல்லித்தந்த பாடங்கேட்டு
பக்குவமா வாழோணும் !

ஆரிரரோ ஆரிரரோ
ஆராரோ ஆரிரரோ .